مراجعة ملحمة "الإلياذة"

غلاف الإلياذة

مراجعة ملحمة "الإلياذة" بترجمة "درينى خشبة" :

عظمة على عظمة يا هوميروس والله أبدعت النهاردة 😁💜

بس انا اللي غايظني بجد ،بجد ياعني .. هو إن المعركة الطويلة العريضة دي كلها علشان ولية راحت خانت جوزها في غيابه ..
يا سيدي مكانتش جوازة ياعني إرمي عليها يمين الطلاق وكبر دماغك مافيه مليون ست غيرها تحبك وتتمناك 😁😁

ياعني تقطيع الرؤوس وذبح البشر والمعركة الدموية دي كلها علشان خاطر الولية الخاينة ،بنت الوزة دي ..!؟!ظظظ

موجهة لهيلين 🤣

بس نقول ايه بقى إحنا بنتكلم في زمن ٩ قرون قبل الميلاد فا وقتها حاجة زاي كدا معناها كتبت على نفسك الموت .

بس عجبني حوار عبث الأقدار بتاع الآلهة دا ،في المعركة خلاص آخيل حط السيف في بطن هكتور وخلاص المفروض هكتور مات .. تكمل قراية باقيت السطر ،يقولك أصل الإله أبوللو دافع عنه وحماه من الضربة ولذلك الإله فوقه وصحاه تاني يكمل المعركة ،مشاء الله آلهة زاي الفل .🤣💜
لولا عبث الأقدار دا اللي كل أما آخيل أو هكتور يجي يقتلوا حد ،يقولك أصل مش عارف الإله الفولاني حماه من الضربة وفوقه تاني أو يقولك الإله عمل ضباب في المعركة علشان محدش يشوف حد ،بكلمكم جد والله 😂،لو مكانش فيه تدخل من أي إله كان زمان القصة إنتهت من أول هجوم من الجيشين والله 🤔😁🌷

بس حلو برضه إن كل إله بينفذ أوامر وطلبات اللي بيصليله ويدعيله ،آلهة بتاعة مصالحها تصليلي وتدعي هظبطك غير كدا معرفكش ،بس بتقوم بالواجب الآلهة ياعني ،بتردلك الدعوة في وقتها ،مش زاي آلهة تانية تدعيها ١٠ سنين تردلك الدعوة بعد ماتموت 😁🌷

ولا أحلى حاجة بقى في فصل "فزع الآلهة" من ترجمة درينى خشبة الفصل دا موتني ضحك 😂
بيقول فيه الآتي :
"قلق زيوس من اعتزال أخيل اقتحام الحرب .
وكيف لا يقلق سيد الأولمب وكل من الفريقين يصلي له ، ويطلب منه العون ، ويتوسل إليه أن يظفر بعدوه ، فتنجاب هذه الغاشية التي صرعت الرجال ، وضرجت أديم الثرى بدماء الأبطال !"

جيش طروادة يدعوا على جيش أسبارطة لزيوس ، وكذلك جيش أسبارطة يدعي على جيش طروادة لزيوس برضه ،طب زيوس يستجيب دعوة مين دلوقتي ؟

زيوس : أعمل إيه انا في الحيرة دي بقيييييي ؟

الجيشين وهما بيدعوا على بعض لزيوس

طب والله زيوس دا إله زاي العسل 😂

دا حتى لما إستشار باقي الآلهة علشان يشوف هيعمل إيه في مصيبة الدعوات اللي نازلة عليه من الجيشين دي ،بدل ما يقعدوا يحلوا المشكلة وباقي الآلهة تهديه وتخليه يروق كدا ،ويطلعوا مثلاً بإقتراح نهائي إنهم يخلوا الجيشين يتصالحوا وكل واحد يرجع بلده وخلاص يفضوا الليلة سيرة من المعركة ..
لأ الآلهة قالتلك إنهم هينقسموا فريقين ،آلهة تنفذ دعوات جيش طروادة وآلهة تنفذ دعوات جيش اسبارطة ،يا سلام على الجمال والحنية
🌨😁🤗

إجتماع الآلهة

بس يا ويلك من غضب الآلهة وخصوصاً غضب زيوس ..
دا لو زيوس زعل منك أو سمع منك كلمة وحشة عليه هيظبطك ،هيحدف عليك صاعقة تنزل على دماغك صواريخ 😂💔،ومش هيحلك غير لما تتأسفله وتعيطله تحت التمثال بتاعه زاي الكلب كدا .

الإله زيوس ملك الأولمب

ولا أحلى حتة بقى حوار الحصان دا 😂،قصة ماتجيش على بال الدبان الأزرق حتى ..
الأغريق أخيراً قرروا يبدعوا ويعملولنا حاجة نعرف نخش بيها المدينة ونحتلها ونخلص أم الحكاية بقى ..
فقالك يبقى مافيش غير الحصان ،حصان ايه يعم الحج !؟ حصان طروادة ،خطة متخرش الماية 😁 عملوا حصان خشبي (طوله 108 متر ووزن 3 أطنان) ،وبعد إنتهاء صنع الحصان ،قالوا لملك طروادة إنهم عاملين الحصان كهدية وعرض للسلام ،بالرغم من تحذيرات "لاكون" و"كاساندرا" (قائدان من الجيش الطروادي) إن الملك يرفض الهدية ،ولكن أمر الملك بإدخاله إلى المدينة في احتفال كبير .

صورة رمزية لحصان طروادة

احتفل الطرواديون برفع الحصار وابتهجوا ،ولكن خرج الإغريق من الحصان داخل المدينة في الليل من مخبأ سري ،وكان في الوقت دا كل أفراد المدينة في سُكر بسبب الحفلة اللي عملوها ،فا الأمر كان سهل تماماً على الإغريق إنهم يروحوا يفتحوا البوابات للسماح بباقية الجيش بالدخول ،فنهبت المدينة بلا رحمة، وقتل كل الرجال، وأخذ كل النساء والأطفال كعبيد.
خطة في منتهى الذكاء ،ويا سلام لو انا بحضر المعركة ،وشايف الحصان وهو بيخش ،واللي بيحصل بعيني كدا 😁 يااااه

وبكدا تكون تحققت نبوءة الأميرة كاساندرا ،اللي تنبأت بالمستقبل في بداية القصة ،قالت قبل ولادة الأمير باريس بأن المولود هيكون سبب في دمار طروادة .وقد تحقق كما رأينا .

معرفة المستقبل عن طريق السحر

بس بآمنة ترجمة "درينى خشبة" زاي الفل ،ربما في أول ٥٠ صفحة بالمقدمة متفهمش الحكاية والحوار بس لما تكمل هتعرف تجمع وتلم الدنيا ،دا خصوصاً إن الإلياذة الأصلية مش مكتوب فيها الموضوع من بدايته ،زاي نشأة آخيل ونشأة باريس وايه اللي حصل مع باريس والآلهة بالتفاحة الذهبية ،ومقدمة مهمة جداً لازم تفهمها قبل ماتخش على العمل ،لأنك لو قرأت الإلياذة الأصل بدون المقدمة دي ،مش هتفهم حاجة وهتكون تقيلة عليك ..

دا غير إن درينى ملخصها ،ياعني لو انت مش هتعمل دكتوراة في الإلياذة فعليك بترجمة درينى ،هي الإلياذة عامةً تقيلة ،حتى ترجمة درينى تقيلة ،ياعني من أولها لآخرها لازم تكون عامل حسابك إنك تكون فايق وانت بتقرأ ؛لأنك لو فَوِّتْ حاجة هتبوظ الدنيا ومش هتعرف تجمع خالص ،حتى لو سرحت في سطر ولا سطرين إعمل حسابك إنك هترجع تركز فيهم تاني 😁 بس ماعدا أول ٥٠ صفحة ،زاي ما انا قولت دول ممكن متفهمهمش من أول مرة بنسبة كبيرة ؛لأنك لسة بتجمع الحدوتة ،ولما تخش على اللي بعد كدا هتبدأ تجمع وتعرف الدنيا ماشية إزاي ..

ونقطة كمان كتير من الناس منزعجين منها في ترجمة درينى ،هي إن درينى بيستعمل مصطلحات من القرآن في الترجمة زاي :

- إن يكن قد أصاب الطرواديين قرح فقد أصاب الهيلانيين قرح مثله
- إنه حيث ولّي قثمّ وجه أخيل
- وزلزلت الأرض زلزالها
- فلا تبقي ولا تذر
- ودعوا ثبورا كثيراً
وغيرهم ..

بس الناس إعتبارتها إهانة وقلة زوق في إستخدام آيات قرآنية في غير محلها ..
انا شخصياً الموضوع مفرقش معايا أوي ،ومضايقنيش ،مكانش فيه مشاكل إنه يحط آيات قرآنية في العمل ،حتى الآيات غير ملحوظة ،ياعني مركبش الآيات على القصة بشكل مبالغ فيه ،دا بس عامل منظر كدا ياعني على إنه الراجل اللي مافيش منه إتنين وبيترجم من القرآن وكدا ..

لكن كما نوهت مسبقاً ترجمة درينى ملخصة ،ولو انت عاوز تفهم القصة كلها بتفاصيل التفاصيل ،مش هتلاقيها في ترجمة درينى شوفلك ترجمة تانية بقى ،زاي ترجمة "أحمد عثمان" مراجعات اللي قرأوها بيقولوا على الترجمة دي أعمق وأحسن بس دي حوالي ٨٠٠ صفحة .. وإنشاء الله لو عرفت أجيبها هبقى أقراها ،بس في نهاية المطاف شكلي هلجأ "للبي دي إف" ربنا يسهل بقى ..



وطبعاً مش هنسى أشكر المترجم المحترم أستاذ "درينى خشبة" على هذه الترجمة الرائعة . ❤❤
وكذلك أشكر المعلم هومير المشكوك في وجوده أساساً . 💜💜
.
.
ملحوظة عامة قبل ما أقفل الريفيو ،دي مصيبة لو متعرفهاش لحد دلوقتي

• الإلياذة = إليوم = طروادة

.
.
وبشكر كل اللي كمل المراجعة لحد الآخر 😍💜🌷

رابط الريفيو على جود ريدز :
https://www.goodreads.com/review/show/3106891318